لأن التكريم هو عربون شكر باسم المجتمع المدني لكل رب عائلة تعب في تكوين عائلته والمحافظة عليها، سهر على صحة أبنائه، عمل بجدّ وإخلاص فصار مثالاً يحتذى، ولأنّ التكريم لا يقتصر فقط على الأدباء والشعراء ورجال السياسة والأعمال، لذلك، تستكمل بلدية الحازمية حملة تكريم "كبارنا" .

وكان الموعد يوم الأربعاء في 20/2/2019 بمنزل السيد الياس يوسف سماحه حيث اجتمع المجلس البلدي ومختاري البلدة وبعض من الفعاليات وقدموا للسيد الياس سماحة درعاً تكريمية على مسيرة حياته المشرّفة، وكانت للرئيس جان الياس الأسمر كلمة بحضور المكرّم وعدد من افراد عائلته جاء فيها: 

" الكبار بيعيشو زمن النعمة مع الرب، بيجدّدو ايمانهم وبيعلــّمونا كيف نتغلّب على المحن القاسية. هني متل الأشجار المثمرة اللي بعدها عم تعطي ثمر رغم الأيام والسنين اللي مرقت بحلوها ومرها. هالكلام للبابا فرنسيس ومنه حبيت انطلق اليوم، تا نحكي عن العم الياس سماحه؛ هالرجال اللي عاش حياته بخوف الله، بالتقوى والايمان، كان وبعده السند الكبير لأهل بيته، والإيد البيضا لكل جيرانه والمحبين.

عم الياس، 

انت اللي عشت طفولة صعبة، وخلــّصت من الموت بأعجوبة، الله كافاك بأولاد بيرفعو الراس: جوزف وعيلته بالسويد، جاك وعيلته بأميركا وبنتك جيزال وعيلتها معك بتملــّـي بيتك. 

انت الرجال الأمين والمحبوب بعملك، ربنا زادك من نِعمه وصرت أمين على الكتير، وكلنا منحبك، منشان هيك جينا لعندك اليوم، مع نائب الرئيس والزملاء الأعضاء والمخاتير وبعض الأحبة، تا نقلك اللي كتبناه بحروف الدهب على الدرع التكريمية: 

العزيز الياس يوسف سماحه 

من قلب الحازمية الى قلبكم المعطاء... 

من ذاكرة الحازمية الى تاريخكم الحيّ...

كل المحبة والتقدير!"