تستكمل بلدية الحازمية تكريم رموز البلدة وكبارها، وللمناسبة توجّه رئيس المجلس البلدي السيد جان الياس الأسمر يرافقه نائب الرئيس الشيخ يوسف حبيش والأعضاء الى منزل الرئيس السابق جوزف نمر مونس بمعيّة مختاري البلدة واعضاء المجلس الإختياري وبعض من كبار موظفي البلدية وفعاليات البلدة، وقد أطلق الرئيس الأسمر مفاجأة بإعلان العمل الجدي على تسمية شارع باسم الرئيس جوزف نمر مونس  نزولاً عند رغبة الزملاء الأعضاء والمخاتير. 

سادت التكريم أجواء عائلية محبّبة، وكان للرئيس جان الياس الأسمر الكلمة التالية: 

"مسا الخير 

مسا الذكريات الحلوة اللي انطلقت من هالبيت!

مسا العلاقات المميّزة اللي بتجمعنا ببيت مونس، من زمان، مش من هلق.

صحيح مشوار الشأن العام حلو، بس ما في شك انو خلال مشوارنا واجهتنا صعوبات... تحدّيناها !  

واجهتنا مشاكل ... غلبناها !

مع الرئيس النمر جوزف نمر مونس، بلّشنا نرسم وجه جديد للحازمية، بانتخابات العام 1998 ... 

هو اللي ما كان ينتمي لأي حزب، وهو الرجل المعروف بنظافة كفّه وبمساعدته لأبناء الحازمية خلال فترات الحرب، كان وبعده معتدل بأفكاره، بيحب الكل والكل بيحبه.

اشتغلنا سوا، وايد بايد طوّرنا البنى التحتيّة والفوقيّة.

استعنّا بخبرة الريس جوزف بشركة الكهربا اللي قضا فيها عمره مسؤول، واستعنا كمان بمعارفه، وقدرنا نبلش مشوار التطوّر ونربطه بالعراقة.

كمّلنا على نهجه خطانا بالدورات المتالية  (2004 / 2010 / 2016)، بنهج العراقة والتطور، حتى صارت الحازمية اليوم واحدة من اهم المدن اللبنانية اللي منفتخر بالانتماء الها.

بهالجَمعة الحلوة اليوم ما فينا ما نتذكر الأخ والصديق، المرحوم جورج مونس، الداعم الأول لنهج الحوار والقرار بكل الدورات!

ومنوجّه كمان تحية للخال والزميل والصديق أنطوان مونس اللي ترافقنا نحنا واياه بدورتين متتاليتين (2004 و 2010)، وشو بحب أندهلك "خال" هالكلمة اللي بتدل على عمق العلاقات المميّزة والإحترام الكبير، والصداقة القريبة.

واليوم عم نكمّل المشوار مع العزيز المدلّل عادل مونس.

ريس جوزف، 

مع رفيقة الدرب، الست سونيا، عملتو عيلة منحبها ومنشوف حالنا فيها، ومنشوف حالنا بعادل جوزف مونس، زميلنا بالمجلس البلدي، وبالمهندس سامي والسيدة ميراي وزوجها المهندس ميشال عطوي وعيالهم.

كلنا سوا اليوم مجتمعين ببيتك تا نـقلك من قلبنا، اللي حفرناه ع الدرع التكريمي: 

الرئيس العزيز جوزف نمر مونس وعقيلته السيدة سونيا

من قلب الحازمية الى قلبكما المعطاء... من ذاكرة الحازمية الى تاريخكما الحيّ...

كل المحبة والتقدير!

ريس جوزف،

هيدا الدرع رح يتبعه تسمية شارع باسمكم بالقريب العاجل لأنه رغبة كل الزملا الأعضاء.

انت عطيت كتير للحازمية، واجا الوقت تكرمك مدينتك، وتشكرك ع كل عطاءاتك، وسوا رح منزقف لتاريخ جوزف نمر مونس اللي عرف يترك بصمة حلوة بالحياة وبالعمل وبالشأن العام. 

باسمي، واسم زملائي أعضاء المجلس البلدي، ومخاتير الحازمية، منقلك نحنا منحبك يا أحلا وأحب ريس!" 

الحازمية بتشوف حالك فيها !