+961 5 450 198

أهم الأخبار والأحداث

07
Dec
2019

عيد المحبة والعطاء

احتفلت الحازمية، بلدة وبلدية، بعيد المحبة والعطاء مع "كبارنا" يوم السبت في 7/12/2019 في القاعة العلوية للقصر البلدي حيث اجتمع على مائدة الغداء السنوية رئيس واعضاء المجلس البلدي ومختاري البلدة ورئيس لجنة التجار وكهنة الرعايا ورئيسة وأعضاء أخوية الحبل بلا دنس وحشد من كبار الموظفين واللجان الشبابية وحوالي مئتي شخص من كبار الحازمية. 

افتتح المستشار الإعلامي في بلدية الحازمية روي حرب الحفل مرحّباً بالحضور مشدّداً على أهمية هذا اللقاء العائلي رغم كلّ الظروف، سيما وأنّ الحازمية عاهدت أبناءها على الوقوف الى جانبهم في الضيقات والأفراح، ثمّ كانت بعدها كلمة لرئيس المجلس البلدي السيد جان الياس الأسمر زفّ فيها خبر افتتاح مركز الرعاية الصحية الأولية أبوابه لبناء الحازمية والخدمات الطبيّة المميّزة التي يقدّمها داعياً الجميع للاستفادة الفعلية والفعالة من هذه الخدمات لأنّ الحازمية كانت وتبقى مدينة انسانية بامتياز، كما وعد الحضور باستمرار حملة تكريم الكبار في منازلهم ما إن تعود الأوضاع الى طبيعتها تدريجياً في البلاد لأنّ مشوار عمرهم مشرّف، فمعهم وبفضل ثقتهم بالمجلس البلدي باتت الحازمية نموذجاً يحتذى بخ ومدينة "بتشوف حالك فيها". 


كلمة رئيس المجلس البلدي:

" صباح الخير  

أهلا وسهلا فيكم كبارنا الغاليين ع قلوبنا... 

الكهنة الأجلاء  ...  زملائي أعضاء المجلس البلدي ... مخاتير الحازمية  ...

رئيسة وأعضاء أخوية الحبل بلا دنس ... أعضاء لجنة الوقف ...

رئيسة مركز الرعاية الصحية د. ناديا الأسمر والممرضات العزيزات 

مسؤولة مكتب التنمية المحلية ... اللجان الشبابية الناشطة 

أهلي واصحابي 


ما بيكتمل العيد إلا بحضوركم معنا ... 

بالـ 2017 وعدناكم ... وبلّشت ورشة العمل ... مركز رعاية صحيّة متطوّر ... الحلم كبير والشغل كتير ... 

هالحلم اللي درسناه بالأول مع د. ميشال فغالي ود. ناديا الأسمر، وعملنا لاحقاً على اقراره مع زملائي أعضاء المجلس البلدي، تا يصير الحلم مشروع!

تواصلنا مع UNDP اللي قدّمتلنا الدراسات الهندسيّة، وحوّلت مركز البلدية القديم لمركز رعاية بيراعي متطلّبات زوّاره وبيحترم المواصفات العالميّة، وكرمال هيك اشتضفنا مسؤول المنظمة العالمية في روما... 

ما قبلنا نوقف عند هون، مع صديقنا سعادة النائب د. فرد بستاني، وبواسطته، تواصلنا مع السفارة اليابانيّة اللي زوّدت هالمركز بأحدث المعدات الطبيّة المتطوّرة بقيمة تسعين ألف دولار... 

وحتى تكتمل الصورة كانت د. ناديا صلة الوصل مع الجامعة اللبنانية الأميركية LAU اللي رح تقدّم كل الدعم والإشراف والمتابعة الطبية المتخصصة، ورح يستفيد المواطنين، وكمان التلاميذ المؤهلين...  

وبالفعل بلش مركز الرعاية الصحية الأولية شغله التجريبي بالحازمية ابتداء من 2/12/2019 تا يكون هدية مميّزة جداً من البلدية لكل شخص من ابناء الحازمية، لأنّ صحتكم هي أولويتنا...  بيقدّم المركز خدمات طبية مختلفة من تمريض وطب عيون وأسنان، طب عائلي نسائي وأطفال، طب شيخوخة وقلب وأمراض نفسية وغيرها الكتير.


ورح نتواصل مع اللازم من الأطباء اللي ساكنين بالحازمية، أو اللي راغبين بالخدمة والعطاء، تا نأمّن برنامج طبي أكثر شموليّة وبيراعي كل الحاجات.


الممرضات صارو جاهزين تا يستقبلوكم، وكتار منكم زاروهم بالسابق ... والأطباء كمان، وباسمكم بحب أشكر كل طبيب وطبيبة تبرّع بوقته وعلمه وخبرته تا يكون موجود معنا بهالروح الإنسانيّة الحلوة. 

وشو هوّي العيد إلا مشاركة بعضنا بالإنسانيّة والمحبة!


ومن جديد، برجع بأكّد إنو بلدية الحازمية، كانت ورح تضل حدكم، بكل الظروف، لو مهما تغيّرت الأيام، ورغم كل الصعوبات اللي عم نعيشها اليوم على صعيد البلد، رح منضل سوا، ورح نتخطى كل الأزمات سوا، لأنه معكم حوّلنا الحازمية لمدينة منشوف حالنا فيها ... لمدينة الإنسان أولويّة فيها !


كبـارنا ... 

منلتقي معكم  خلال السنة بمناسبات مختلفة ، ولكن عيد الميلاد بيضل إلو رونق خاص، لأنه بيجمع العيلة، وانتو عيلتنا الكبيرة. 

أطلقنا  سنة الماضية حملة تكريم "الكبار" وبالفعل زرنا البعض منكم وكرّمناهم ومنوعدكم نستكمل هالحملة قريباً، لما يرجع البلد لطبيعته، لأنو متل ما منكتب ع درع المحبة، منفتخر بمشوار عمر كل شخص منكم، تعب وكدّ وجاهد، ضحك وزعل، وربّى عيلة... أنتو مثال لإلنا ولولادنا، ومنشوف حالنا فيكم !


الشكر ... كلّ الشكر للزملاء أعضاء المجلس البلدي، والكهنة والأطباء والمخاتير ولجنى التجار وكل الداعمين على كل اللي عم بيقومو فيه لمساعدة أبناء البلدة والبلدية.


ينعاد عليكم بالمحبة والصحة والبحبوحة .. .

عشتم ... عاشت الحازمية .. عاش لبنان ! "